Informasjon
Søknad om helse-og omsorgstenester etter Pasient-og brukarrettigheitslova kap 2. « Rett til nødvendig hjelp frå kommunen si helse-og omsorgsteneste» jmf Helse-og omsorgstenestelova kap 3. « Kommunen sitt ansvar for helse-og omsorgstenester.»
Søknaden vert handsama konfidensielt i tråd med:
- Offentlegsheitlova § 13: Opplysningar som er underlagt teieplikt i lov eller i medhald av lov, er unnateken frå innsyn
- Forvaltningslova § 13: Einkvar som utfører tenester eller arbeid for eit forvaltningsorgan, pliktar å hindra at andre får adgang eller kjennskap til det han får vita i høve til tenesten eller arbeidet.
Ullensvang kommune nyttar elektronisk system for pasientjournal, for sakshandsaming og journalføring. Når du søkjer om tenester, blir du registrert i dette systemet. I tråd med Helseregisterlova og IPLOS forskrifta, vert det registrert IPLOS ( Individbasert pleie og omsorgs statistikk), som er data som kommunane rapporterar anonymt til staten.
TILDELING AV HELSE OG OMSORGSTENESTER
Ullensvang kommune har eit tildelingskontor som skal sikra lik tilgang på helse-og omsorgstenester for innbyggjarane, uavhengig av alder,tenestebehov og bustad.
Søknader og spørsmål knytt til helse-og omsorgstenester i kommunen skal rettast til tildelingskontoret.
Koordinerande eining for habilitering og rehabilitering
Ullensvang kommune har ein koordinerande eining med ansvar for å sørge for at brukarar med omfattande tenestebehov får samordna tenester for å sikre eit heilskapeleg tilbod.
Kreftkoordinator
Ullensvang kommune har ein eigen kreftkoordinator som skal yte bistand til personar med kreft. Dette er ein lett tilgjengelig teneste som ikkje krev søknad.
Demenskoordinator
Ullensvang kommune har ein eigen demenskoordinator som kan yte bistand til brukarar med demens og deira pårørande. Tenesta krev ikkje søknad.
Ved tildeling av tenester vert det lagt vekt på brukardeltaking med fokus på:
- Hjelp til sjølvhjelp
- Kva du kan klare sjølv
- Kva eventuell andre i husstanden kan klare
- Kva du og våre medarbeidarar kan gjera saman
- Kva våre ansatte kan hjelpa deg med
Målet er å bidra til ein så uavhengig og sjølvhjulpen kvardag som mogeleg.
Du kan søkje om:
- Omsorgsbustad / Omsorgsbustad for demente med 24 timars tilsyn
- Tryggleiksalarm
- Støttekontakt
- Matombringing
- Praktisk bistand (heimehjelp)
- Helsehjelp i heimen
- Hjelpemidlar
- Omsorgsstønad
- Avlastning
- Dagaktivitetstilbod (for brukarar som har demens sjukdom)
- Tiltakspakke ved kognitiv svikt/demens
- Dagtilbod for brukarar innan psykisk helse eller brukarar med funksjonshemming
- Dag- og nattopphald
- Kortidsopphald på institusjon
- Periodevise korttidsopphold på institusjon
- Rehabiliteringsopphald på institusjon
- Langtidsopphald på institusjon
- Brukarstyrt personleg assistent eller personleg assistent
- Koordinator og Individuell plan
- Parkeringskort for HC
Tildelingskontoret kan ikkje tildela:
- Legehjelp
- Helsesøster-og skulehelsetenester
- Behandling hos fysio-og ergoterapeut
- TT-kort
- Kommunale boligar, trygdeboligar
Når får du svar
Du vil innan 7 dagar få svar på at søknad er mottatt.
Sakshandsamingstida er normalt sett til 3 veker. Innan denne tida vil det føreliggja anten eit vedtak om kva og kor mykje hjelp du vert tildelt, eller du vil få avslag på søknaden. Dersom det er vedtak på ei teneste, skal denne starte opp så snart som mogeleg. Nokre tenester kan det vera ventetid på.
I nokre høve er det behov for ei meir utgreiing for å finna det rette tenestetilbodet.
Du vil få melding om kva som skal gjerast før det kan fattast endeleg vedtak, samt kor lang sakshandsamingstid ein reknar med.
Individuell vurdering
Alle søknader om tenester vert vurdert individuelt av fagpersonar. Vurderinga skjer i dialog med deg anten pr telefon, møte på tildelingskontoret eller ved heimebesøk. Samarbeidet med deg som søkjer er viktig for å finna fram til rett tenestetilbod. Sakshandsamar og dei som utfører tenesten samarbeider og har teieplikt.
Vedtak
Tildelingskontoret fattar vedtak som i hovudregel gjeld for ein bestemt periode. Vedtaket beskriv kva slags teneste du får og evt mengde og type hjelp som vert tildelt. Dersom det skal betalast for tenesten, vil dette stå i vedtaket.
Dersom behovet for hjelp vert endra, pliktar du, dine pårørande eller dei som utfører tenesten å melde frå til tildelingskontoret, slik at nytt vedtak vert fatta.
Vederlag og eigenandel
- Matombringing, dagaktivitetstilbod, tryggleiksalarm,dagopphold, tidsbegrensa opphald i sjukeheim: det er eigenandel uavhengig av inntekt.
- Praktisk bistand: Eigenandelen blir rekna ut frå skatteoppgjør frå siste år.
- Langtidsplass i sjukeheim: Ein betalar 75% av grunnpensjon og 85% av anna inntekt etter frådrag av skatt m.m. og opplysningar om skatteoppgjør, inntekt, renteinntekter,stønad frå folketrygda og private pensjonar må sendast institusjonen.
- Omsorgsbustad: Ein inngår avtale om husleige og betalar fast husleige kvar mnd.
Klage
Du kan klage på avslag på søknad eller på at du får mindre hjelp eller anna hjelp enn den du har søkt om. Du kan og klage på kvaliteten på dei tenestane som vert utført.
Korleis du skal klage og kor klagen skal sendast, vil stå i vedtaksbrevet.
Henvendingar
Treng du bistand til å søkje eller andre råd om tenester osb, kan du ta kontakt med tildelingskontoret.
